惡屎能登和兩歲幾咋

「唔好跳呀，會跛架！行好D啦，我都唔想鬧你架！你兩歲幾咋，點解會咁唔正經架！」女人大大聲鬧小朋友，當正走下兩級樓梯，在一兩個梯級然後大大塊平地的一條道路上。

心中閃過一個念頭好想企定定行注目禮告知她，架係自己丟。但對小朋友太不公平，而擦身而過的短短三句就已夠樂趣無窮了。

一、記得幾歲的我落小巴是用雙腳跳的。就算今天落校巴，也不確保每次全程腳踏實地。既然小腿願意分擔，怎麼逼人只用單腳四頭肌完成整個動作啊。兩歲多小朋友的腿，可不是生來用於給大人行的梯級。兇巴巴前請去找個比自己膝蓋高的梯級走下一次。

二、唉呀你都唔想鬧人架，那麼委屈啊陰功豬！又要鬧，又要話唔想鬧。食了蛋糕又要擁有之，食晒兩家茶禮，神又係你鬼又係你。大人的同義詞是奸。

三、唔正經的兩歲幾，哇哈怎麼我覺得好可愛。Google唔正經三字，第一頁就有骨場有好好波，我諒解，兩歲幾咋就唔正經的確是挺教人吃驚呢。而假如唔正經只是等如活潑好動，你確定兩歲幾咋應該比廿幾歲收憸？